በተዋረድ ያላችሁ ወንድሞቼ እና በጌታ የተወደዳችሁ ልጆቼ

የታላላቅ ከተሞች እምብርት ከሆነችው ከተማ፣ የታላቋ ቤተክርስቲያን የሃጊያ ሶፍያ**** መገኛ ከሆነችው ከተማ፣ በዓለም ላይ ቀድሞ ባማይታወቅ መልኩ እንደ ሰው ልጆች የገጠመንን መከራ እና  የተከሰተውን ኮቪድ-19 ኝ ወረርሽኝን በማስመልከት ለሴቶችም፣ ለወንዶችም፣ ለልጆችም ይህን መልእክቴን ለማስተላለፍ ወደድኩ

የእናት ቤተክርስቲያን ድምጽ በእንዲህ ዓይነቱ ሠዓት ዝም አይልም፡፡ በዘመናት ከትውፊት እና ከሥርዓተ ቅዳሴው በተማርነው እና ባወቅነው መሰረት በማበረታታት እና በማስተዛዘን እንዲህ እንናገራለን፡፡

እራሳቸውን እና ቤተሰቦቻቸውን በመተው እና በመስዋዕትነት የሚታገሉትን በመጥቀስ በታላቅ አክብሮት ልናመሰግናቸው እንወዳለን፡፡ በተለይም፡-

• በሕመሙ የተያዙትን እና እነርሱን በመርዳት ላይ ያሉትን የሕክምና ባለሙያዎችን ዶክተሮችን እና ነርሶችን
• ከበሽታው እና ከጭንቀቱ እንገላገል ዘንድ ለበሽታው መድኃኒት ለማግኘት ለሚተጉ ተመራማሪዎች እና ሳይንቲስቶች
• እና ለሌሎች ይህንን ወረርሽኝ እየታገላችሁ ላላችሁ በሙሉ ታላቅ ምስጋናዬ ይድረሳችሁ

እያደረጋችሁት ያለው ነገር፤ ለሁሉም ማኅበረሰብ የቀረበ እጅግ የከበረ ስጦታ ሲሆን ታላቅ እና የከበረ ምስጋና የሚገባው መስዋዕትነትም ጭምር ነው፡፡ በመሆኑም ሁላችንም በአንድነት እና በኅብረት እናመሰግናችኋለን፣ እናከብራችኋለን፡፡ ይህም የሚሆነው ከመጋረጃ ጀርባ ሳይሆን በሁሉም ቦታና ጊዜ ነው፡፡ ሐሳባችንም ፀሎታችንም ከእናንተ ጋር ነው፡፡

በዚህ የትግል ወቅት፡- ይህን አስጊ ሁኔታ ለማለፍ የሚስፈልገውን ዕቅድ ማውጣትና መጋፈጥ በቅድሚ የሚመለከታቸው የተመረጠው መንግስታችን፣ መንግስታት፣ እና የሚመለከታቸው የጤና ኃላፊዎች ሲሆኑ እነዚህን በሰው ልጆች ሁሉ ላይ በጠላትነት የተነሳውን፣ የማይታየውን ነገር ግን በአሁን ሰዓት የሚታወቀውን ጠላት የሚዋጉ የጦር አዛዦቻችን እንላቸዋለን፡፡

በጫንቃቸው ላይ ያለው ኃላፊነት የሁላችንንም ትብብር ይሻል፡፡ በግልም በማህበርም ኃላፊነታችንን ልንወጣ የሚገባበት ሠዓት አሁን ነው፡፡

ስለዚህ ወንድሞች ሆይ፡ መንግስታችን እና የጤና ኃላፊዎቻችን የሚነግሩንን አስቸጋሪ ግን አስፈላጊ ነገሮች በታማኝነት እንፈጽም ዘንድ እኛ መንፈሳዊ አባቶቻችሁ እንማለላችኋለን፡፡ የሚነገረን ሁሉ የዚህን ቫይረስ ስርጭት ለመግታት ይቻል ዘንድ ስለ እኛው ደህንነት እና መልካምነት ስለሆነ፣ ከዚህ ነገር የምንገላገለው ሙሉ በሙሉ በምናደርገው ትብብር መሆኑን አንዘንጋ፡፡

ምናልባት አንዳንዶቻችሁ ይህ በመንግስት የሚወጣ አዋጅ፣ ዕምነታችንን የሚጎዳ እና የሚያኮስስ ነው የሚል ስሜት ሊያድርባችሁ ይችላል፡፡ ይሁን እንጂ ጉዳዩ ስለ እምነታችን ሳይሆን ስለ አማኞቻችን ነው፡፡ ስለ ክርስቶስ ሳይሆን ስለ ክርስቲያኖቻችን ነው፡፡ ሰው ስለሆነው አምላክ ሳይሆን ስለ ሰዎች ነው፡፡

ሃይማኖታችን ባህላችን ላይ መሰረት ያደረገ ሕያው ሃይማኖት ስለሆነ ምንም ዓይነት ነገር ሊወስነው እና ሊጫነው አይችልም፡፡ በዚህ አስቸጋሪ ጊዜ ሊወሰን እና ሊገታ የሚገባው ነገር የሕዝቦች መሰባሰብ እና ትልልቅ ጉባኤ ነው፡፡  በቤታችን በመቀመጥ በዙሪያችን ያሉትን እንጠብቃቸው፡፡ በቤታችን በመሆን በመንፈሳዊ አንድነታችን እያንዳንዳችን ለሰው ዘር በሙሉ ፀሎት እናድርግ፡፡

ወደ ተስፋይቱ ምድር በበረሃ እንደሚደረግ ጉዞ ይህንን ዘመን እናልፈዋለን፡፡ ወንድሞቻችንም በእግዚአብሔር ረድዔትና ዕገዛ መድኃኒቱን ያገኙታል፡፡

በጸሎታችን ኃይልና በሳይንስ እገዛ እንደምናሸንፍ እርግጠኞች ነን፡፡ ስለዚህ የንሰሃ እና የቅድስና ተጋድሎዋችንን እየፈጸምን በመንፈስ አንድ እንሆን ዘንድ ይገባል፡፡

ጎረቤቶቻችን በበሽታው ሲማቅቁ እየተመለከትን ጥቂቶችም በሞት ተነጥቀው ከመካከላችን ሲለዩን እያየን ነው፡፡  ቅድስት ቤተክርስቲያችን ለታመሙት ፈውስን፣ በሞት ለተለዩን ምህረትን እና የችግሩ ሰለባ ለሆኑ ቤተሰቦችም ጥንካሬን እና መጽናናትን ያገኙ ዘንድ ተስፋ በማድረግ ጸሎት ታደርጋለች፡፡

ደመናው ተገፎ፣ የቅድስና ፀሐይም የዚህን መርዛማ ቫይረስ ችግር አስወግዶ መከራው ያልፋል፡፡ ነገር ግን ሕይወታችን ለአንዴና ለመጨረሻ ጊዜ ተቀይሮ ያልፋል፡፡ ይህ ፈተና ፍቅርና አንድነትን የምንመሰርትበትን የዕድል አቅጣጫ አመላክቶናልና፡፡

ውድ በጌታ የተወደዳችሁ ልጆቼ ሆይ፣ የእግዚአብሔር ጸጋ፣ የቅድስተ ቅዱሳን ወላዲተ-አምላክ አማላጅነት፣ መንገዳችንን ያቅናልን፡፡ በቤታችን ያደረግነውን መለየት ወደ እውነተኛ አንድነት ይቀይርልን፡፡ ወደ እውነተኛው እና እግዚአብሔርን ወደ ሚያስደስተው ይመልሰን፡፡ ጸሎታችንም መዳረሻችንም ይሁን፡፡ አሜን፡፡

እግዚአብሔር ከእናንተ ጋር ይሁን፡፡ ብርታት ይኑራችሁ፡፡

የቁስጥንጥንያው ፓትሪያክ ብጹዕ በርቶሎሜዎስ ቀደማዊ ኮሮና ቫይረስን አስመልክተው በመጋቢት 10/2012 /March 19-20/ያስተላለፉ መልዕክት

*** ሃጊያ ሶፍያ በቱርከ እስታንቡል ውስጥ የምትገኝ ለ1000 ዓመታት ያህል በዓለማችን ትልቋ ካቴድራል በመባል የምትታወቅ ቤተክርስቲያን ነች፡፡ ባለ ትልቅ ጉልላት ቤተክርስቲያን በመሆኗም የሕንጻ ዲዛይነሮችን ታሪክ የቀየረችም ነች፡፡ ይሁን እንጂ በኋላ በ1453፣ በኦቶማን ቱርክ ሙስሊሞች አማካይነት ወደ መስኪድነት ተቀይራ ለተመልካች ዝግ ሆና ስትኖር የነበረች ሲሆን ዛሬ ከ 1931 ጀምሮ በሙዚየምነት የምታገለግል ብዙ ተመልካች ያላት ቦታ ነች፡፡